ತುಳುನಾಡ್, ಆಚರಣೆ🚩

ಪೊರ್ಲ ಪೊದಿಕೆದ ತುಳುವ ನಾಡ್ದ ಸಂಸ್ಕೃತಿ ಸಂಸ್ಕಾರ ಒರಿಪುನಲ್ಪ ಪಜ್ಜೆ ದೀಕ...🙏

ಕರಿನ ಜನ್ಮಡ್ ಪುಣ್ಯ ಮಲ್ದಿತ್ತುಂಡ ಈ ಜನ್ಮಡ್ ನಮ್ಮ ಈ ಪುಣ್ಯ ಭರತ ಮಣ್ಡ್ ಪುಟ್ಟುದು ಬರ್ಪಗೆ, 

ಅಂಚನೇ ಕರಿನ ಏಳೇಲ್ ಜನ್ಮದ ಪುಣ್ಯ ಇತ್ತುಂಡ ನಮ್ಮ ಈ ತುಳುವ ಮಣ್ಡು ಪುಟ್ಟುದು ಬರ್ಪ ಪನ್ಪಿ ಪಾತೆರ ಉಂಡು ಇಂಚಿತ್ತಿ ಪುಣ್ಯ ಭೂಮಿ ನಮ್ಮ ತುಳುವ ನಾಡ್.....

ಪ್ರಪಂಚದ ಒವ್ವೆ ಮೂಲೆಗ್ ಪ್ರಾಕೃತಿಕ ವಿಕೋಪ ಬರಡ್,  ಒಲ್ಪ ಸುನಾಮಿ, ಜ್ವಾಲಾಮುಖಿ, ಉಲ್ಕಾಪಾತ, ಭೂಕಂಪ, ಬೊಲ್ಲ,  ಇಂಚ ವಾ ಪ್ರಾಕೃತಿಕ ವಿಕೋಪ ಬತ್ತುಂಡಲಾ ನಮ್ಮ ತುಳುವ ನಾಡ್ಗ್ ಇನಿ ಮುಟ್ಟ ಅಂಚಿತ್ತಿ ದೋಷೊಲು ಬೈದಿಜಿ... ದಾಯೆ ಪಂಡ ನಮ್ಮವವು ದೇವ ಭೂಮಿ, ಅರ್ಥಾತ್ ದೇವೆರೆ ಕೊರ್ತಿನ ಭೂಮಿ....

ದೇವೆರ್ ದೈವೋಲೆನ ಆವಾಸ ಸ್ಥಾನ ಉಂದು, 

ಪ್ರಪಂಚಡ್ ಪುದರ್ ಪೋಯಿನ ದೇವ ಮಂದಿರೊಲು ಇಪ್ಪುನು ನಮ್ಮ ತುಳುವ ನಾಡುಡ್, 

ನಾಗರಾಧನೆದ ವಿಶಿಷ್ಟ ಸಂಸ್ಕಾರದ ಸಂಸ್ಕೃತಿ ಇಪ್ಪುನು ನಮ್ಮ ತುಳುವ ನಾಡುಡ್, 

ವಿಶೇಷ ನಂಬಿಕೆದ ಆಚರಣೆ ದೈವಾರಾಧನೆ ಇಪ್ಪುನುಲಾ ನಮ್ಮ ತುಳುವನಾಡುಡೆ... 

ದೇವೆರೆಗ್ ಕುಲ್ದಿ ಪಟ್ಟ ದೈವೋಲೆಗ್ ತಿರ್ಗು ಪಟ್ಟ ಪಂದ್ ನಂಬುನ ನಂಬಿಕೆಲಾ ನಮ್ಮ ತುಳುನಾಡ್ದ, 

ರಾಜ್ಯಸ್ಥಾನ , ನ್ಯಾಯಸ್ಥಾನ  ಧರ್ಮ ಸ್ಥಾನ ಪನ್ಪಿ ಮೂಜಿ ಪಜೆದ ಒರುಟ್ ನ್ಯಾಯತಿರ್ಮಾನ ಕೊರ್ಪಿನ ನಂಬುಗೆದ ಕೊಡಿಯಡಿ ಇಪ್ಪುನುಲಾ ನಮ್ಮ ತುಳುವ ನಾಡುಡೆ.... 

ಆಟಿದ ಅಮಾಸೆ, ಸೋಣದ ಸಂಕ್ರಾಂತಿ, ದೀಪಾವಳಿದ ಬಲಿ ಪಾಡ್ಯಮಿ, ಪತ್ತಾನಾಜೆ ಕಟ್, ನಾಗರ ಪಂಚಮಿದ ಗೌಜಿ, ಅಂಕ ಆಯನದ ಪೊರ್ಲು, ಆಟ ಕೋಲ ನೇಮ ನಡಾವಳಿ ಅತ್ತಂದೆ ಬೆನ್ನಿದ ಕಜ್ಜ ಇಂಚ ನಮ್ಮ ತುಳುವ ನಾಡ್ದ ಆಚಾರ ವಿಚಾರ ನಂಬುಗೆ ಒಂಜಾ ರಡ್ಡಾ...

ವಿಶಿಷ್ಟ ಆಚರಣೆ, ನಂಬುಗೆ ಸಂಸ್ಕೃತಿದ ಒರುಟ್ ವಿಶ್ವ ಮಾನ್ಯವಾದಿತಿ ನಮ್ಮ ತಳುವ ಸಂಸ್ಕೃತಿ ನಿಧಾನವಾದ್ ಪಜ್ಜೆ ತತ್ತೊಂದುಂಡು ಪನ್ಪುನವು ಇನಿ ಕೊಡೆ ಅಪಾಯದ ಸೂಚನೆ ಕೊರೊಂದುಂಡು,

ತುಳುವ ನಾಡ್ದ ಜವನೆರ್ ಮುಲ್ಪು  ಬೆನ್ನಿ ಬೆನ್ಪಾದ್ ನಾಲ್ ಜನಕ್ ನುಪ್ಪು ಪಾಡುನಕ್ಲು ತನ್ನ ಬಂಜಿದ ಪಡಿಕ್ಜಾದ್ ಈ ಮಣ್  ಬುರ್ದು ದಂಡುದ ರಾಜ್ಯಡ್ ಕುಡೋರ್ಯಡ ಕೈ ತಿರ್ತ್  ಸಂಬಳಗ್ ಬೆನೊಂದುಲ್ಲೆ...

ಪಡಿಲ್ ಬುರ್ತಿ ಕಂಡೋಲೆಡ್ ಇಷ ಪುಗೆ ಬುಡ್ಪಿ ಕಂಪನಿ ನಂಜಿ ಕಕ್ಕೊಂದುಂಡು,... ದೈವಾರಾಧನೆ ದೇವತಾರಾಧನೆ ನಾಗಾರಾಧನೆ ಸಾಧಿತತ್ತೊಂದುಂಡು, 

ಆಚಾರ ವಿಚಾರ ನಂಬುಗೆ ಪಜ್ಜೆ ಬುಡೊಂದುಂಡು, 

ತುಳುವ ಸಂಸ್ಕಾರ ನಿಧಾನವಾದ್ ಮದೆ ಅವೊಂದುಂಡು.... 

ಉಂದುವೇ ಕಾರಣಗ್ ತುಳುವ ನಾಡುಗ್ಲ ನಿಧಾನವಾದ್ ಪೃಕೃತಿ ಅಪ್ಪೆ ಮುನಿಯೊಂದುಲ್ಲೊಲು,

 ಸೀಕ್ ಸಂಕಟ ಬರೊಂದುಂಡು...

ಉಂದು ಮಾತ ಅಪಾಯದ ನಡುಟ್ ತುಳು ಒರಿಪಾಲೆ ಪಂದ್ ಒಂಜಾತ್ ಜವನೆರ್ ದುಂಬು ಬರೊಂದುಲ್ಲೆರ್, 

ಸಂಘ ಸಂಘಟನೆದ ಮೂಲಕ ಮೂಲ ಸಂಸ್ಕಾರ ಒರಿಪುನಂಚಿ ಪಜ್ಜೆ ದೀಪುನವು ಖುಷಿತ್ತ ವಿಚಾರ, 

ಬೇತೆ ಬಾಷೆಡಪ್ಪ ಪೆಟ್ ಲಡಾಯಿ ಮಲ್ಪಂದೆ,

 ಕಾಲಿ ಬಾಷೆ ಮಾತ್ರ ಒರಿಪುನತ್ ಅವೆತ್ತೊಟ್ಟು ಈ ಮಣ್ದ ಸಂಸ್ಕೃತಿ‌ ಸಂಸ್ಕಾರಲಾ ಒರಿಪಾವೊಂದು, ನಂಬಿಕೆ ನಡಾವಳಿಕೆನ್ ದೆರ್ತ್ ಪತ್ತೊಂದು ದೀಪಿನ‌ ಪಜೆಗ್ ನಮ್ಮ ತುಳುವ ನಾಡ್ಗ್ ಬೀಜುನ‌ ಗಾಳಿ ದೊರಿಯುನ‌ ಬರ್ಸ ಅತ್ತಂದೆ ಮೂಜಿನೆತ್ತ ಬರಂದಿಲೆಕ ವಜ್ರದ ಬೇಲಿ ಆದ್ ಕಾಪು ರಕ್ಷಣೆ ಮಲ್ಪುನ ಸರ್ವ ಶಕ್ತಿಲೆನ, ಬೇರಿಸಾಯ ಇಪ್ಪಡ್ ಪಂದ್ , 

ಕಣ್ಗ್ ತೋಜಂದಿ ಸತ್ಯೋಲೆಡ ಕೈ ಮುಗಿದ್ ನಟ್ಟೊಂದುಲ್ಲೆ....🙏🙏

✍🏻

ಆರ್ ಕೆ ಕೊಳಂಬೆ

Credit: ಆರ್ ಕೆ ಕೊಳಂಬೆ